Ахмад настны эрүүл насжилт — ширээний теннис

Яагаад энэ төсөл вэ?

Хүн ам насжихын хэрээр халдварт бус өвчин, унаж бэртэх, хөдөлгөөний чадвар буурахтай холбоотой эрүүл мэндийн зардал өсдөг. Дэлхийн эрүүл мэндийн байгууллага 65-аас дээш насныханд тэнцвэр, булчингийн хүчийг хөгжүүлэх олон төрлийн хөдөлгөөнийг долоо хоногт 3-аас доошгүй өдөр хийхийг зөвлөдөг. Ширээний теннис нь жижиг өрөөнд, цаг агаараас үл хамааран, эрчмээ өөрөө тохируулан тоглох боломжтой тул ахмад настанд хүртээмжтэй.

Гэвч ийм хөтөлбөрийн үр нөлөөг Монголд тоо баримтаар хэмжсэн судалгаа бараг байхгүй. Энэ төсөл хөтөлбөрийг хэрэгжүүлэхийн зэрэгцээ үр дүнг нь хэмжиж, бодлого болгох нотолгоо бүрдүүлэх зорилготой.

Юу хийх вэ?

• Хичээл: 3 хороо/ахмадын төвд ширээ байрлуулж, мэргэшсэн дасгалжуулагчтай 60 минутын хичээлийг долоо хоногт 2 удаа, 6 сар явуулна.
• Суурь ба эцсийн хэмжилт: артерийн даралт, биеийн жингийн индекс, тэнцвэр ба явах чадвар (Timed Up and Go, нэг хөл дээр зогсох), хөлний хүч (30 секундэд сандлаас босох), амьдралын чанар (EQ-5D асуумж).
• Ирц, явцын бүртгэл: оролцогч бүрийн ирц, тестийн үр дүнг цахим системд бүртгэж, нэргүйжүүлсэн өгөгдлөөр шинжилнэ.
• Харьцуулалт: хөтөлбөрт хамрагдаагүй ижил насны бүлэгтэй харьцуулна.

Хүлээгдэж буй үр дүн

• Оролцогчдын тэнцвэр, хөдөлгөөний чадвар, амьдралын чанарын өөрчлөлтийн тоон үнэлгээ.
• Нэг оролцогчид ногдох зардал болон эрүүл мэндийн зардлын боломжит хэмнэлтийн зардал-үр ашгийн шинжилгээ.
• Хороо, дүүрэг, Засгийн газарт хүргэх бодлогын товч зөвлөмж, өргөжүүлэх загвар.

Хамтран ажиллах

Төслийг ширээний теннисний клуб, хорооны ахмадын хороо, санхүүжүүлэгч түншүүдтэй хамтран хэрэгжүүлнэ. МЭЗЭМ ТББ төслийн удирдлага, хэмжилт, үнэлгээ, тайлагналыг хариуцна. Санхүүжилтийн эх үүсвэр, зарцуулалтыг төслийн тайланд ил тод нийтэлнэ.

Эх сурвалж: WHO guidelines on physical activity and sedentary behaviour, 2020.